المشهد المصرى مربك عن عمد فحاصل جمع 1+1 أصبح لايساوى 2
اللى حصل فى مصر ثورة؟ ولا حاجه تانيه؟
باعتراف المجلس العسكرى كانت ثورة
يبقى ماختلفناش
ايه اللى بيحصل بعد أى ثورة فى العالم؟
نشوف ظباط الجيش عملوا ايه فى ثورة يوليو (اللى فى ناس دلوقتى بتقول عليها انقلاب عسكرى).
عملو محاكم غدر وتأميم ممتلكات لدرجة ان كان فى ناس بتتظلم بس كانو بيقولو طبيعى فى فترة مخاض الثورة
ومسحو بأستيكه كل النظام السابق ابتداء من الملك اللى نفوه خارج مصر وحتى اصغر موظف فى الدوله (تطهير)
يبقى ايه؟؟؟؟؟
الثورة دى مختلفه؟ ولا ايه؟؟؟ ولا ثورة دور تانى؟؟؟؟
الناس بتطالب بالاجراءات الطبيعية بعد أى ثورة مش بتطالب بحاجه عجيبه يعنى؟ ولا حاجه استثنائيه.
بالعكس الناس بتطالب بمحاكمات عادلة امام القضاء المدنى ومش بتطالب بتأميم ولا بتاع.
بس براااااااااااااااااااااافو
احزاب وتيارات وتخوين وعمالة وفلوس بتيجى من أمريكا.
على أساس ان الفلوس دى دخلت تهريب؟ ولا حد جابها فى اكياس سوده؟
طيب ماشى
العيال بتوع 6 ابريل خونه وبياخدو فلوس من امريكا يبقى ليه بنعامل أمريكا على انها حليف؟ مع انها بتخرب البلد؟
وبتجند شباب وبتدربهم؟ وليه بناخد معونات (ماليه وعسكريه) من دوله المفروض ان نواياها كوخه؟
ولو فى دليل مادى على ان الشباب دول خونه وعملا يبقى يتحبسوا مش نطلع نسيحلهم فى الاعلام واحنا سابينهم كده؟
ولا دى حملة تشويه فقط؟؟؟؟؟
نيجى بقى للأمن دخل التلاجه ومش عايز يخرج
والمحاكمات النص كم
وكلام كتير عن طرف تالت وطرف خفى وأزمات سولار وبنزين وغاز وغيره وغيره
حكومات مش عارفه بتحكم مين ولا ازاى
ومجلس شعب نواياه طيبة والباقى على الله
مطالب الثورة واضحه وعادله للجميع
واللى بيعمل عبيط الايام دى عشان يحقق مكاسب سياسية على المدى القصير هايدفع التمن بعدين
بس للأسف.....
مش هايدفع التمن لوحده....هاندفعه كلنا
No comments:
Post a Comment